మంచి సాహిత్యం 5

చిత్రం : "స్వర్ణ కమలం"

శివ పూజకు చివురించిన సిరి సిరి మువ్వా
శివ పూజకు చివురించిన సిరి సిరి మువ్వా
సిరి సిరి మువ్వా సిరి సిరి మువ్వా
మృదు మంజుల పదమంజరి పూచిన పువ్వా
సిరి సిరి మువ్వా సిరి సిరి మువ్వా
యతిరాజుకు జతి స్వరముల పరిమళమివ్వా
సిరి సిరి మువ్వా సిరి సిరి మువ్వా
నటనాంజలితొ బ్రతుకును తరించనీవా
సిరి సిరి మువ్వా సిరి సిరి మువ్వా

పరుగాపక పయనించవే తలపుల నావ
కెరటాలకు తలవంచితె తరగదు త్రోవ
ఎదిరించిన సుడి గాలిని జయించి నావా
మది కోరిన మధు సీమలు వరించి రావా
పరుగాపక పయనించవే తలపుల నావ
కెరటాలకు తలవంచితె తరగదు త్రోవ

పడమర పడగలపై మెరిసే తారలకై
పడమర పడగలపై మెరిసే తారలకై
రాత్రిని వరించకే సంధ్యా సుందరి
తూరుపు వేదికపై వేకువ నర్తకివై
తూరుపు వేదికపై వేకువ నర్తకివై
ధాత్రిని మురిపించే కాంతులు చిందని
నీ కదలిక చైతన్యపు శ్రీకారం కాని
నీ కదలిక చైతన్యపు శ్రీకారం కాని
నిదురించిన హృదయ రవళి ఓంకారం కాని

తన వ్రేళ్ళే సంకెళ్ళై కదలలేని మొక్కలా
ఆమనికై ఎదురు చూస్తు ఆగిపోకు ఎక్కడా
అవధి లేని అందముంది అవనికి నలుదిక్కులా
ఆనందపు గాలి వాలు నడపని నిన్నిలా
ప్రతి రోజొక నవ గీతిక స్వాగతించగా
వెన్నెల కిన్నెర గానం నీకు తోడుగా

చలిత చరణ జనితం నీ సహజ విలాసం
జ్వలిత కిరణ కలితం సౌందర్య వికాసం
నీ అభినయ ఉషోదయం తిలకించిన రవి నయనం
నీ అభినయ ఉషోదయం తిలకించిన రవి నయనం
గగన సరసి హృదయంలో వికసిత శతదళ శోభిత సువర్ణ కమలం